ரேஷன் கடைகளில் வழங்க அதிகவிலை பருப்பு கொள்முதல் ஏன்? தமிழக அரசுக்கு நீதிமன்றம் கேள்வி
தமிழகத்தில் செயல்பட்டு வரும் ரேஷன் கடைகளில் வழக்கமாக வழங்கப்பட்டு வரும் குறைந்த விலையில் கிடைக்கும் மசூர் பருப்பை வாங்காமல் அதிக விலை கொடுத்து கனடியன் மஞ்சள் நிற பருப்பு கொள்முதல் செய்யப்படுவது ஏன் என நீதிமன்றம் தமிழக அரசிடம் விளக்கம் கேட்டு உத்தரவிட்டுள்ளது.
இது குறித்து பருப்பு வியாபாரம் செய்து வரும் தனியார் நிறுவனம் தொடர்ந்த வழக்கில் இரு வாரங்களில் தமிழக அரசு விளக்கமளிக்க உயர் நீதிமன்றம் உத்தரவு பிறப்பித்தது.
குறைந்த விலையில் கிடைக்கும் சத்து அதிகமுள்ள சிவப்பு நிற மசூர் பருப்பை கொள்முதல் செய்து ரேஷன் கடைகளில் வழங்கலாம் என மத்திய உணவுத்துறை அனைத்து மாநில அரசுகளுக்கும் அறிவுறுத்தியது. இந்நிலையில் இதற்காக தமிழக அரசின் சார்பில் வெளியிடப்பட்ட டெண்டரில் இந்த பருப்பை சேர்க்கவில்லை என பருப்பு மொத்த வியாபாரம் செய்து வரும் தனியார் நிறுவனம் சென்னை உயர் நீதிமன்றத்தில் வழக்கு தொடர்ந்தது. இந்த வழக்கை விசாரித்த உயர் நீதிமன்றம் தமிழக அரசிடம் இது குறித்த விளக்கத்தை 2 வாரங்களில் அளிக்க வேண்டும் என உத்தரவு பிறப்பித்துள்ளது.
